ဆောင်းဥတု ကို အံတုနိုင်သော အစားအစာများ

ရှေးကလူကြီး များသည် ဥတုအလိုက် ဓာတ်စာ စားခြင်းဖြင့် အသက်ရှည် ကြသည်။ ဒေသနာနယ ဆေးပညာဟု ခေါ်သည့် ဗုဒ္ဓစာပေ ကျမ်းဂန်လာ ပထဝီ၊ အာပေါ၊ တေဇော၊ ဝါယော ဓာတ်ကြီး လေးပါးကို အခြေခံသည့် ဆေးပညာ တွင်လည်း လူတို့ခန္ဓာကိုယ် သို့ ရောဂါ ရောက်ကြောင်း လေးပါးမှာ ကံ၊ စိတ်၊ ဥတု၊ အာဟာရ ဟု ဆိုထားခြင်းကြောင့် ဥတုကြောင့် ဖြစ်သော ရောဂါရှိ နိုင်သည်။ ဥတုနှင့် သင့်လျော်သော အစားအသောက်၊ အနေအထိုင်၊ အပြုအမူကို ပြုရမည်၊ မပြုလျှင် ရောဂါရမည်ဟု သိထားသင့် ပေသည်။

ဆောင်းဥတုသည် အေးသော ချမ်းသော ရာသီဥတု ဖြစ်သည်။ အေးသည် ဆိုခြင်းမှာ ခန္ဓာကိုယ်ပြင်ပ အသားအရေတွင် အေးခြင်းဖြစ်သည်။ ချွေးမထွက် ရသဖြင့် ခန္ဓာကိုယ်တွင်း မှ အပူတို့သည် အပြင်သို့ မထွက်နိုင်၊ အတွင်းတွင် အပူငုပ် နေသည်။ ထို အောင်းနေသော အပူကို အပြင်သို့ ထွက်စေရန်၊ ပွင့်စေရန် တစ်နည်း အားဖြင့် အခိုးပွင့် စေရန် ဓာတ်စာများကို စားရမည်ဟု ရှေးက ဓာတ်စာဖြင့် ကုသည့် သမားတော်ကြီး များက အမိန့်ရှိ ခဲ့ကြသည်။ အချို့ ဆေးဆရာ သမားတော်ကြီး များကလည်း ဝမ်းတွင်းမှာ အပူအကျဉ်း ကျနေသည်ဟု ယူဆပြီး အပူကို အေးအောင် ဆေးဝါး သို့မဟုတ် ဓာတ်စာ ပေးပြီးလျှင် အောက်သို့ သက်စေသော ဝမ်းမှန်၊ လေသက် ဆီးသက် စေသော အစာကို ပေးရမည်ဟု ဆိုသည်။

ထို့ကြောင့် ဆောင်းဥတုတွင် စားသင့်သော အစားအစာ များမှာ -
အတွင်းမှာ ငုပ်နေသော အပူကို အေးစေရမည်။
အခိုးအာကာသ ပွင့်စေသော အစာဖြစ်ရမည်။
ဆီး၊ ဝမ်း၊ လေ သက်စေသော အစာမျိုးဖြစ်ရမည်။

ထိုကဲ့သို့သော အစားအစာ မျိုးကို ရွေးချယ် စားသုံးသော သူသည် ရောဂါဘယ ကင်းဝေး၍ ကျန်းမာသော ခန္ဓာကိုယ်ကို ပိုင်ဆိုင်ကာ မိမိအကျိုး၊ မိသားစုအကျိုး၊ လူအများ အကျိုး၊ တိုင်းပြည် အကျိုး အထိ သယ်ပိုး နိုင်လိမ့်မည် ဖြစ်သည်။ ”အာရောဂျံ ပရမံလာဘံ” ကျန်းမာခြင်းသည် လာဘ်ကြီး တစ်ပါးဟု ဘုရားဟော ရှိသည်နှင့် အညီ ဖြစ်ပေ လိမ့်မည်။

လူတို့ စားသောက်သော အစားအစာများစွာ ရှိသည်။ ထို အစားအစာ များကို အရသာအားဖြင့် ခွဲခြားရလျှင် ရသာခြောက်ပါး၊ အရသာ ခြောက်မျိုးသာ ရှိသည်ကို တွေ့ရသည်။ ထို အရသာများမှာ အချို၊ အချဉ်၊ အငန်၊ အစပ်၊ အခါး၊ အဖန် အရသာတို့ ဖြစ်သည်။ အစားအသောက် စားသောက်ရာတွင် ရသာခြောက်ပါး စုံအောင် စားရမည်ဟု ဆိုသည်။ သို့သော် ဥတုအလိုက် ပို၍ စားသင့်သော အရသာလည်း ရှိသည်။ ကျန်းမာရေး ရှုထောင့်မှ ဆောင်းရာသီတွင် ပို၍ စားရမည့် အရသာမှာ ”အချဉ်” အရသာ ဖြစ်သည်။
အချဉ် အရသာသည် စားလိုက် သည်နှင့် လျှာပေါ်တွင် အပွင့်ဓာတ် အရသာ ပေါ်စေပြီး ဆက်ပြီး စားချင် သောက်ချင်စိတ် ဖြစ်ပေါ် စေသည်။ ခံတွင်း မကောင်းသူသည် ထမင်းပွဲတွင် ထမင်းမစားမီ ချဉ်ရည်ဟင်း ကလေးကို အလျင် သောက်လိုက် ပါက ထမင်း စားချင်စိတ် ချက်ချင်း ဖြစ်ပေါ် လာသည်ကို တွေ့ရသည်။ အချဉ်၏ သတ္တိသည် အပွင့်သတ္တိ ဖြစ်သည်။ ဆောင်းဥတုနှင့် သင့်လျော်သော ဓာတ်စာအစား အစာများမှာ -

မန်ကျည်းရွက်၊ ကင်မွန်းချဉ်ရွက်၊ မုန်ညင်းရွက်ချဉ်ရည်ဟင်း။
ရှောက်သီးသုပ်၊ မုန်လာချဉ်သုပ်၊ ခံတက်ချဉ်သုပ်၊ နှမ်းဖတ်ချဉ်သုပ်။
ဒန့်သလွန်သီး၊ ခရမ်းသီး၊ ကုလားပဲ၊ အာလူး မန်ကျည်းမှည့် ၏ အရည်နှင့်ချက်သည့် ကုလားဟင်း။
ငါးခူ၊ ငါးကြင်း၊ ငါးဖယ်အသားခြစ်၊ နှမ်းဆီနှင့်ကြော်၍ မန်ကျည်းမှည့်အရည်နှင့် ပြန်ချက်သောဟင်း။
ငါးပြေမ၊ ငါးရံ့ပေါက်၊ ငါးနုသန်း၊ စောင်းလျားသီး၊ ဆီးဖြူ သီးတို့နှင့် ရောချက်သောဟင်း
တို့ဖြစ်သည်။

Credit : Yadanarpondaily

 ဤစာဖတ်သူများအားလုံးကျန်းမာချမ်းသာကြပါစေလို့ရွှေချစ်သူမှဆုတောင်းမေတ္တာပို့သပေးပါတယ်။

မျှဝေပေးခြင်းဟာလည်းမေတ္တာတစ်မျိုးပဲမို့ မျှဝေပေးပါနော်...