အရက်နာကျ ခြင်းကို သက်သာစေတဲ့ သစ်တော်သီး ရဲ့ စွမ်းပကားများ

အရက်အလွန်အကျွံ သောက်မိမယ့် ည မတိုင်ခင်မှာ အရည်ရွှမ်းတဲ့ သစ်တော်သီးတစ်လုံးကို ကြိုတင်စားသုံးထားခြင်းဟာ နောက်တစ်နေ့မနက်မှာ ကြုံတွေ့ရမယ့် အရက်နာကျခြင်း ရဲ့ သက်ရောက်မှုတွေကို ကာကွယ်ပေးနိုင်တယ်လို့ သုတေသန ပြုလုပ်သူ သိပ္ပံပညာရှင်တွေက အခိုင်အမာဆိုလိုက်ကြပါတယ်။

သုတေသီတွေရဲ့ ပြောကြားချက်အရတော့ အရက်သောက်မယ့် ည မတိုင်မီမှာ သစ်တော်သီးစားထားခြင်းရဲ့ အကျိုးဆက်ဟာ အရက်နာကျခြင်းရဲ့ ဒုက္ခတွေကနေ ၂၁ ရာခိုင်နှုန်းခန့် ထိ ပိုမို ကောင်းမွန်သွားစေနိုင်တယ်လို့ သိရပါတယ်။

အဲဒီလို အရက်မသောက်ခင်ညနေပိုင်းမှာ အရည်ရွှမ်းတဲ့ သစ်တော်သီး တစ်လုံး ကြိုတင်စားသုံးထားခြင်းဟာ အာရုံ စူးစိုက်မှုကို ပိုမို အားကောင်းစေခြင်း ၊ မှတ်ဥာဏ်ဆုံးရှုံးမှုကို လျှော့ချပေးခြင်း နဲ့ သွေးကြောထဲမှာ ယမကာ စီးဆင်းမှု နှုန်းကို လျော့ကျစေနိုင်ခြင်းစတဲ့ အကျိုးသက်ရောက်မှု တွေကို ရရှိစေနိုင်တယ်လို့ သြစတြေးလျအစိုးရ အဖွဲ့ရဲ့ သိပ္ပံပညာရှင်တွေက ပြောပြခဲ့ပါတယ်။

ဒါ့အပြင် သစ်တော်သီးတွေဟာ လူတစ်ယောက်ရဲ့ အလင်းရောင်နဲ့ အသံ တို့ကို မခံနိုင်ခြင်းတွေကိုလည်း လျော့ကျစေပါတယ်။

အခုတစ်ခေါက် သုတေသန ပြုလုပ်တဲ့အခါမှာ လေ့လာဖို့ အသုံးပြုခဲ့တာကတော့ အာရှထွက် Nashi ဆိုတဲ့ သစ်တော်သီး တစ်မျိုးဖြစ်ပြီး ထို သစ်တော်သီးတွေကို ဗြိတိန် နိုင်ငံ က စူပါမားကတ် တွေမှာလည်း ၀ယ်ယူရရှိနိုင်ပါတယ်။ ဒါပေမယ့်လည်း သုတေသီတွေကတော့ အနောက်ပိုင်းဒေသ တွေမှာ ပေါက်ရောက်တဲ့ သစ်တော်သီးတွေကရော အာရှထွက် သစ်တော်သီးတွေလို ကောင်းမွန်တဲ့ သက်ရောက်မှု မျိုးရှိနိုင်သလားဆိုတာကိုတော့ လေ့လာနေဆဲ ပဲ ဖြစ်ပါတယ်။

သြစတြေးလျ အစိုးရ ရဲ့ သိပ္ပံပညာဆိုင်ရာ သုတေသန အဖွဲ့အစည်းတွေကနေ ထုတ်ပြန်ခဲ့တဲ့ ကြေညာချက်အရတော့ အရက်နာကျခြင်း ရဲ့ သက်ရောက်မှုတွေကို လျှော့ချနိုင်ဖို့အတွက် အရက်မသောက်ခင် ညနေမှာ သစ်တော်သီးဖျော်ရည် ၂၂၀ မီလီလီတာ ခန့် (သို့) သစ်တော်သီးတစ်လုံးခန့်ကို စားသုံးရမယ်ဆိုတာပဲ ဖြစ်ပါတယ်။

Credit : ThitHtooLwin

ဤစာဖတ်သူများအားလုံးကျန်းမာချမ်းသာကြပါစေလို့ရွှေချစ်သူမှဆုတောင်းမေတ္တာပို့သပေးပါတယ်။

မျှဝေပေးခြင်းဟာလည်းမေတ္တာတစ်မျိုးပဲမို့ မျှဝေပေးပါနော်...